“ အိုင်တီခေတ်ရဲ့ စွဲလမ်းမှုပြဿနာ ”

“ အိုင်တီခေတ်ရဲ့ စွဲလမ်းမှုပြဿနာ ”


တံခါးမဲ့ ဓါးမဲ့
အားလုံးအလည်လာလို့ရတဲ့
စကားလုံးဥယျာဉ်ရဲ့ ရင်ပြင်မှာ

နင်နဲ့ငါနဲ့
အလိုက်သင့်စီးဝင်မျော …
ဒါ ငါမက်မောတဲ့
ညနေခင်း ကော်ဖီတစ်ခွက် ။

ပန်းရောင်နှောင်တွယ်ခြင်းနဲ့
အစိမ်းရောင်တံတိုင်းကိုဖယ်
အဖြူရောင်ကို လက်လှမ်းပေမယ့်
နင်ခြွေချတဲ့
အပြာနုရောင် အသည်းစကားက
လွမ်းရမှာကြောက်တဲ့ ငါ့ရင်ကိုထိရှ ၊
ဒါ … ငါမမြင်ဖူးတဲ့
ခြေရာပျောက်ကဗျာရဲ့ ကာရံလှလှတစ်ပိုဒ် ။

စကားလုံးနဲ့တင် ရင်ခုန်ချင်တတ်တဲ့
ပန်းတစ်ပွင့်ရဲ့အထာဟာ
မာယာတွေမပါတာ ..(အပြင်မှာ)
မဆုံဖူးပေမယ့် … ယုံချင်ရင်
ယုံလိုက်နိုင်တဲ့ ဘာသာရပ် ။

အစကတည်းက ယုံချင်ချင်
ယုံကလေး (ယုန်ကလေး)ပါ ။

ယုံတမ်းစကားနဲ့
ထောင့်ငါးရာပုံပြင်
ချရေးပြသွားပြီးတော့မှ
ချိန်းတိုင်း … လွဲတတ်တာ
ဆုံချင်မှ … ပိုဝေးတာ
မျှော်လင့်မှ … ချိုးဖျက်ရက်တာ
အဲဒါ ချက်တင် (Chatting )ထဲက
ဖြေရှင်းမရတဲ့ … စွဲလမ်းမှုပြဿနာ ။

“လွယ်ပါတယ်ကွာ” ဆိုတဲ့ ဘာသာစကားကို
တွင်တွင်ကြီး ထောက်ခံပြနေတဲ့
ပေါင်းကူးတံတား google ကတော့
တစ်နေရာရာမှာ
လက်ပိုက်ပြီး … ပြုံးလို့ ။

တစ်နာရီ (xxxxxxxxx ) ကျပ်
ကိုယ့်ပိုက်ဆံနဲ့ကိုယ်
အသည်းကွဲစရာကို ရှာဖွေလိုရင်
မင်းမျက်လုံးနဲ့ တစ်ချက်ဝေ့ကြည့်လိုက်ရုံပဲ …

Welcome to Net Shop !
Welcome to Google Talk !
Welcome to Tear Drops !

 

 

 

 

 

 

“ လေပြည်ချမ်းချမ်း ”

 22 December 2011